នាព្រឹកថ្ងៃចន្ទ ទី២៥ ខែធ្នូ ឆ្នាំ២០២៣ ឯកឧត្តម កុល វីរក្ស រដ្ឋលេខាធិការ ក្រសួងមហាផ្ទៃ និងជាប្រធានគណៈកម្មការលទ្ធកម្មកំរិតធំនៃគម្រោងសាលាជាតិរដ្ឋបាលមូលដ្ឋាន អញ្ជើញពិនិត្យទីតាំងការដ្ឋានសាងសង់អគារសិក្សា និងអន្តេវាសិកដ្ឋាន នៃសាលាជាតិរដ្ឋបាលមូលដ្ឋាន។ 

អញ្ជើញអមដំណើរក្នុងឱកាសនេះដែរ រួមមានវត្តមាន ឯកឧត្តមផាសុកបណ្ឌិត គាង សេង អនុរដ្ឋលេខាធិការ ក្រសួងមហាផ្ទៃ និងឯកឧត្តម សូ មុនីរក្សា នាយកសាលាជាតិរដ្ឋបាលមូលដ្ឋាន ព្រមទាំងមន្ត្រីរាជការ និងតំណាងក្រុមហ៊ុនសាងសង់។

សូមជម្រាបថា គម្រោងសាងសង់អគារទាំង២ខ្នងនេះ ត្រូវបានសាងសង់នៅលើផ្ទៃដីប្រមាណ ៨ហិកតា ស្ថិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញ ដោយរួមបញ្ចូលនូវហេដ្ឋារចនាសម្ព័ន្ធផ្លូវ ចំណត ទីលានកីឡា និងសួនច្បារ។ អគារសិក្សាថ្មីនេះ មានទំហំបណ្ដោយ ៨០ម៉ែត្រ ទទឹង ៥០ម៉ែត្រ កំពស់ ៣ជាន់ ចំណែកអគារអន្តេវាសិកដ្ឋានមានទំហំបណ្ដោយ ៦០ម៉ែត្រ ទទឹង ៣០ម៉ែត្រ កំពស់ ២ជាន់ ដែលត្រៀមរៀបចំពិធីបញ្ចុះបឋមសិលាសាងសង់នៅពេលខាងមុខ៕