រាជធានីភ្នំពេញ៖ នារសៀលថ្ងៃទី១៥​ ខែមករា ឆ្នាំ២០២៤ ឯកឧត្តម សូ មុនីរក្សា នាយកសាលាជាតិរដ្ឋបាលមូលដ្ឋាន ក្រសួងមហាផ្ទៃ បានអញ្ជើញចូលរួមអមដំណេីរ​ ឯកឧត្តម​ កុល​ វីរក្ស​ រដ្ឋលេខាធិការទទួលបន្ទុក​ ចុះពិនិត្យទីតាំងការដ្ឋានសាងសង់អគារសិក្សា និងអន្តេវាសិកដ្ឋាន នៃសាលាជាតិរដ្ឋបាលមូលដ្ឋាន ដែលមានទីតាំងនៅសង្កាត់គោករកា ខណ្ឌព្រែកព្នៅ រាជធានីភ្នំពេញ។

សូមជម្រាបជូនថា គម្រោងសាងសង់អគារសិក្សា និងអន្តេវាសិកដ្ឋាននេះ ត្រូវបានសាងសង់នៅលើផ្ទៃដីទំហំប្រមាណជា៨ហិកតា ដោយរួមបញ្ចូលនូវហេដ្ឋារចនាសម្ព័ន្ធផ្លូវ ចំណត ទីលានកីឡា និងសួនច្បារផងដែរ។ អគារសិក្សាថ្មី មានទំហំបណ្ដោយ៨០ម៉ែត្រ ទទឹង៥០ម៉ែត្រ កំពស់៣ជាន់ ចំណែកអគារអន្តេវាសិកដ្ឋានមានទំហំបណ្ដោយ៦០ម៉ែត្រ ទទឹង៣០ម៉ែត្រ កំពស់២ជាន់ ដែលបាននិងកំពុងត្រៀមរៀបចំពិធីបញ្ចុះបឋមសិលាសាងសង់នៅពេលខាងមុខ៕