ទីស្តីការក្រសួងមហាផ្ទៃ៖ នៅព្រឹកថ្ងៃពុធ ទី២៤ ខែមករា ឆ្នាំ២០២៤ ឯកឧត្តម សក់ សេដ្ឋា ទេសរដ្ឋមន្ត្រីទទួលបន្ទុកជាអនុប្រធានអចិន្រ្តៃយ៍គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ(គ.ជ.អ.ប) និងជាប្រធានគណៈកម្មការដឹកនាំគម្រោងសាលាជាតិរដ្ឋបាលមូលដ្ឋាន បានអញ្ជេីញជាអធិបតីដឹកនាំកិច្ចប្រជុំលើកទី៦ របស់គណៈកម្មការដឹកនាំគម្រោងសាលាជាតិរដ្ឋបាលមូលដ្ឋាន ដើម្បីពិនិត្យលើវឌ្ឍនភាពនៃការអនុវត្តគម្រោងឆ្នាំ២០២៣ និងទិសដៅឆ្នាំ២០២៤។

កិច្ចប្រជុំនេះក៏មានការចូលរួមពីរដ្ឋលេខាធិការ អនុរដ្ឋលេខាធិការ អគ្គនាយករង នៃក្រសួងពាក់ព័ន្ធ នាយកសាលជាតិរដ្ឋបាលមូលដ្ឋាន ប្រធាន អនុប្រធាននាយកដ្ឋាន និងមន្ត្រីជំនាញជាច្រើនរូបផងដែរ។

ឯកឧត្តម ទេសរដ្ឋមន្ត្រី បានលើកឡើងថា កិច្ចប្រជុំនេះមានគោលបំណងពិនិត្យ និងពិភាក្សាលើរបាយការណ៍វឌ្ឍនភាពនៃការអនុវត្តគម្រោងឆ្នាំ២០២៣ និងទិសដៅឆ្នាំ២០២៤ ហើយឯកឧត្តមបានសម្ដែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងអនុវត្តការងារទាំងក្នុងក្របខណ្ឌសាលាជាតិរដ្ឋបាលមូលដ្ឋាន និងក្របខណ្ឌគម្រោង របស់ថ្នាក់ដឹកនាំ និងមន្ត្រី នៃសាលាជាតិរដ្ឋបាលមូលដ្ឋាន ដែលសម្រេចបាននូវលទ្ធផលការងារជាច្រើន។

ឯកឧត្តម បានបន្ថែមថា ក្នុងដំណើរការនៃការអនុវត្តនូវកំណែទម្រង់នានា ដើម្បីឆ្លើយតបនឹងតម្រូវការ គោលនយោបាយសម្រាប់រាជរដ្ឋាភិបាលនីតិកាលទី៧ ការពង្រឹង និងអភិវឌ្ឍន៍ធនធានមនុស្សពិតជាមានសារៈសំខាន់ ដោយពឹងផ្អែកលើសកម្មភាពបណ្ដុះបណ្ដាល របៀបរបបនៃការបង្រៀន សំដៅធានាបាននូវប្រសិទ្ធភាពនៃការបណ្ដុះបណ្ដាល ដើម្បីឆ្លើយតបបានតាមតម្រូវការជាក់ស្ដែង សម្រាប់រយៈពេលមធ្យម និងរយៈពេលវែង។